स्याङ्जा र पर्वत काँग्रेसको पार्टी कार्यालयलाई कोभिड अस्पताल बनाईँदै

स्याङ्जा, २५ बैशाख । नेपाली काँग्रेस स्याङ्जाले आइसोलेसन कक्ष बनाउन आवश्यक परेमा पार्टी कार्यालय दिने निर्णय गरेको छ ।

कोभिड १९ सङ्क्रमणको जोखिम तथा नियन्त्रणका लागि आईसोलेसन वा कोभिड अस्पताल बनाउन पार्टी कार्यालय प्रयोग गर्न दिने निर्णय भएको कार्यबाहक सभापति बुद्धिबहादुर राना (कुमार) ले जानकारी दिनुभयो ।

‘‘स्याङ्जामा पनि कोरोना सङ्क्रमितको दर बढेकाले अस्पतालमा शय्या अभाव हुन सक्छ”, उहाँले भन्नुभयो, ‘‘बिरामीलाई राखेर उपचार गर्न ठाउँ अभाव भएमा पार्टी कार्यालयलार्य आइसोलेसन वा कोभिड अस्पतालका रुपमा प्रयोग गर्न भवन उपलब्ध गराउने निर्णय गरेका हौँ ।”

स्याङ्जा सदरमुकामस्थित अभियानपथमा रहेको भवनमा स्थानीय, प्रदेश, केन्द्रीय सरकार वा अन्य कुनै पनि गैह्रनाफामुखी संस्थाले आइसोलेसन कक्षका रुपमा प्रयोग गर्न चाहेमा तत्काल दिने उहाँले बताउनुभयो ।

काँग्रेस पर्वतको पार्टी कार्यालय भवनलाई कोभिड अस्पताल बनाईने
नेपाली काँग्रेस पर्वतको पार्टी कार्यालय भवनलाई कोभिड अस्पताल बनाईने भएको छ । जिल्लामा सङ्क्रमण दर बढ्दै गएपछि नागरिकको उपचार सहज बनाउन विपी स्मृति भवनलाई कोभिड १९ रोकथामका लागि अस्थायी अस्पताल बनाउन जिल्ला कोभिड व्यवस्थापन केन्द्रलाई स्वीकृति दिइएको हो ।

नागरिकले उपचारमा समस्या खेप्नु परेकोले कोभिड अस्पताल बनाउन दिने निर्णय गरिएको काँग्रेका केन्द्रीय सदस्य तथा भवन निर्माण समितिका संयोजक अर्जुनप्रसाद जोशीले बताउनुभएको छ ।

सुविधा सम्पन्न यो भवनमा ५० शय्यासम्म राखेर सङ्क्रमितको उपचार गर्न सकिने उहाँको भनाई छ । सदरमुकाम कुश्माबजारकै मुख्य भागमा रहेकाले यो भवनमा अस्पताल बनाउँदा सबैलाई सहज हुने जोशीले बताउनुभयो ।

पर्वत सदरमुकाम कुश्मा बजारमा गत वर्ष गुप्तेश्वर बहुमुखी क्याम्पसमा बनाइएको अस्थायी असपताल हटाएपछि अहिलेसम्म कोभिड अस्पताल सञ्चालनमा आउन सकेको छैन ।