चापाकोटका थप २० जनामा कोरोना संक्रमण पुष्टि

स्याङ्जा, २२ बैशाख । स्याङ्जाको चापाकोट नगरपालिकाका थप २० जनामा कोरोना संक्रमण पुष्टि भएको छ ।

चापाकोट नगरपालिका वडा नं १ मा १, वडा नं २ मा २, वडा नं  ४ मा १, वडा नं ७ मा ७ जना, वडा नं ८ मा ६ जना, वडा नं ९ मा २ जना र वडा नं १ मा १ जना गरी थप २० जनामा कोरोना संक्रमण पुष्टि भएका गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता एवम् निर्देशक डा विनोद विन्दु शर्माले जानकारी दिनुभयो ।

चापाकोट नगरपालिकाका सुचना अधिकारी विन्दु कोइरालाका अनुसार चापाकोट हेल्थ डेक्कमा गरिएको एण्टीजेन परीक्षणको क्रममा २० जनामा कोरोना संक्रमण पुष्टि भएको हो ।

चापाकोटका विभिन्न ठाउँहरुमा पछिल्लो समय ज्वारोका बिरामीहरु बढेको बताउँदै नगरपालिकाका सूचना अधिकारी कोइरालाले कालीगण्डकी खबरसँग भन्नुभयो, ‘‘कोरोनासँग मिल्दोजुल्दो लक्षण भएको व्यक्तिहरुको परीक्षण गर्दा अधिकाशमा कोरोना संक्रमण पुष्टि भएको छ ।”

स्याङजामा कोरोना संक्रमितको संख्या दिनप्रतिदिन बढिरहेको छ । मंगलबारसम्म संक्रमितको संख्या २ सय ७५ पुगेको छ । संक्रमितमध्ये २ सय ४९ होम आइसोलेसनमा, १९ जना विभिन्न स्वास्थ्य संस्थामा र ७ जना क्वारेन्टाइनमा उपचाररत रहेको जिल्ला स्वास्थ्य कार्यालयका कार्यालय प्रमुख विष्णु प्रसाद सुवेदीले बताउनुभयो ।

उहाँले जिल्लामा उपलब्ध रहेका १० अस्पतालमा २ सय १० वेड क्षमता भएपनि अहिलेसम्म कुनै पनि अस्पतालमा आइसीयू र भेन्टिलेटर सहितको सुविधा नरहेको जानकारी दिनुभयो । उहाँका अनुसार वैशाख १ यता ३ जनाको कोरोना संक्रमणबाट मृत्यु भएको छ ।