स्याङ्जाका थप ७ जना कोरोना संक्रमितको निधन

स्याङ्जा, ५ जेठ । स्याङ्जाका थप ७ जना कोरोना संक्रमितको उपचारको क्रममा र होमआइसोलेनमा निधन भएको छ ।

पछिल्लो २४ घण्टामा कोरोना संक्रमणबाट वालिङ नगरपालिकाका तीन, चापाकोट, पुतलीबजार, गल्याङ र भीरकोट नगरपालिकाका एक/एक जना गरी ७ जना कोरोना संक्रमितको निधन भएको स्वास्थ्य निर्देशनालय पोखराले बताएको छ ।

गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता एवम् निर्देशक विनोद विन्दु शर्माका अनुसार वालिङ नगरपालिका वडा १३ की ५५ वर्षीय महिलाको बैशाख ४ गते चरक मेमोरियल अस्पताल, पोखरामा उपचारको क्रममा निधन भएको हो । उहाँलाई जेठ २ गते कोरोना पुष्टि भएको थियो ।

त्यसै गरी वालिङ नगरपालिका वडा १ का ७६ वर्षीय कोरोना संक्रमित पुरुषको पोखरा स्वास्थ्य विज्ञान प्रतिष्ठान पोखरामा उपचारको क्रममा जेठ ३ गते निधन भएको छ । उहाँलाई बैशाख ३१ गते संक्रमण पुष्टि भएको थियो ।

निर्देशक शर्माका अनुसार वालिङ नगरपालिका वडा नं २ की ७७ वर्षीय कोरोना संक्रमित महिलाको होम आइसोलेनमा जेठ ४ गते निधन भएको छ । उहाँलाई जेठ २ गते कोरोना पुष्टि भएको थियो ।

चापाकोट नगरपालिका वडा नं ५ का ७२ वर्षीय कोरोना संक्रमित पुरुषको जेठ ४ गते गण्डकी मेडिकल कलेज पोखरामा उपचारको क्रममा निधन भएको छ । उहाँलाई जेठ १ गते संक्रमण पुष्टि भएको थियो ।

त्यसै गरी पुतलीबजार नगरपालिका वडा नं १ का ९२ वर्षीय संक्रमित पुरुषको उपचारको क्रममा जिल्ला अस्पताल स्याङ्जामा निधन भएको छ । उहाँलाई बैशाख २४ गते कोरोना पुष्टि भएको थियो ।

त्यसै गरी भीरकोट नगरपालिका वडा नं ३ की ७० वर्षीय कोरोना संक्रमित महिलाको होम आइसोलेसनमा निधन भएको छ । उहाँलाई जेठ ४ गते संक्रमण पुष्टि भएको थियो ।

गल्याङ नगरपालिका वडा नं ११ का २७ वर्षीय कोरोना संक्रमित पुरुषको गौतम बुद्ध अस्पताल, बुटवलमा उपचारको क्रममा निधन भएको छ । उहाँलाई बैशाख २३ गते कोरोना संक्रमण पुष्टि भएको थियो ।

जिल्ला स्वास्थ्य कार्यालय स्याङ्जाका अनुसार कोरोना संक्रमणबाट जिल्लामा मृत्यु हुनेको संख्या ७६ पुगेको छ ।